'நிசார்' செயற்கைக்கோள்: பூமியை சல்லி சல்லியாய் பார்க்கும் புதிய கண்கள்

அமெரிக்க விண்வெளி ஆராய்ச்சி நிறுவனமான நாசா (NASA) மற்றும் இந்தியாவின் விண்வெளி ஆராய்ச்சி நிறுவனமான இஸ்ரோ (ISRO) இணைந்து உருவாக்கியுள்ள நிசார் (NISAR) செயற்கைக்கோள், பூமியின் மேற்பரப்பில் ஏற்படும் நுட்பமான மாற்றங்களைக் கண்காணிப்பதில் ஒரு புதிய சகாப்தத்தைத் தொடங்கியுள்ளது. கடந்த ஜூலை 30 அன்று, ஆந்திரப் பிரதேசத்தின் ஸ்ரீஹரிகோட்டாவில் உள்ள சதீஷ் தவான் விண்வெளி மையத்திலிருந்து வெற்றிகரமாக ஏவப்பட்ட இந்த செயற்கைக்கோள், தனது முதல் புகைப்படங்களை வெளியிட்டு, உலகெங்கிலும் உள்ள விஞ்ஞானிகளுக்கு ஒரு புதிய நம்பிக்கையை ஏற்படுத்தியுள்ளது. 

இந்த ஆரம்பப் புகைப்படங்களில், அமெரிக்காவின் அடர்ந்த காடுகள், விரிந்த சதுப்பு நிலங்கள் மற்றும் கடலில் உள்ள சிறிய தீவுகள் ஆகியவை மிகத் துல்லியமாகப் பதிவாகியுள்ளன. இது நிசார் செயற்கைக்கோளின் அபரிமிதமான திறனைக் காட்டுவதோடு, எதிர்காலத்தில் அது வழங்கப்போகும் துல்லியமான தரவுகளுக்கு ஒரு முன்னோட்டமாகவும் அமைந்துள்ளது. 

நிசார் (NISAR - NASA-ISRO Synthetic Aperture Radar) என்பது ஒரு சிந்தடிக் அப்பர்ச்சர் ரேடார் (Synthetic Aperture Radar - SAR) தொழில்நுட்பத்தைப் பயன்படுத்தும் செயற்கைக்கோள் ஆகும். இந்த தொழில்நுட்பம், மேகமூட்டம் மற்றும் இருள் போன்ற பூமியை மறைக்கும் சூழ்நிலைகளிலும் கூட, பூமியின் மேற்பரப்பைத் துல்லியமாகப் படம்பிடிக்க உதவுகிறது. இதன் மூலம், காலநிலை மாற்றத்தால் ஏற்படும் தாக்கங்கள், சுற்றுச்சூழல் சீர்கேடுகள் மற்றும் இயற்கை பேரழிவுகள் பற்றிய தரவுகளைப் (data) பெற முடியும்.

நாசா வெளியிட்ட அறிக்கையின்படி, நிசார் மூலம் பெறப்படும் தரவுகள், இயற்கை பேரிடர்களை எதிர்கொள்வதற்கும், நடவடிக்கைகளை மேம்படுத்துவதற்கும் உதவும். உதாரணமாக, ஒரு பெரிய வெள்ளப்பெருக்கு அல்லது நிலச்சரிவுக்குப் பிறகு, நிசார் செயற்கைக்கோள் விரைவாகப் படங்களை எடுத்து, பாதிக்கப்பட்ட பகுதிகளை அடையாளம் காணவும், மீட்புப் பணிகளைத் திட்டமிடவும் உதவும்.

இந்தத் திட்டம், சர்வதேச விண்வெளி ஒத்துழைப்பின் ஒரு சிறந்த உதாரணமாகக் கருதப்படுகிறது. நாசா மற்றும் இஸ்ரோவின் ஒருங்கிணைந்த திறன்கள், பூமியைப் பாதுகாப்பதற்கான புதிய வழிகளைத் திறக்கின்றன. இந்தச் செயற்கைக்கோள் அடுத்த சில ஆண்டுகளில் தொடர்ந்து தரவுகளை (datas) சேகரிக்கும்போது, அது பூமியின் கடந்தகாலம், நிகழ்காலம் மற்றும் எதிர்காலம் பற்றிய நமது புரிதலை மாற்றியமைக்கும். 

நிசார் என்பது வெறும் ஒரு செயற்கைக்கோள் அல்ல; அது நமது கிரகத்தின் துடிப்பை அளவிடும் ஒரு புதிய கண்கள். இதன் தரவுகள், பூமியின் ஆரோக்கியத்தைப் பாதுகாப்பதற்கான நமது முயற்சிகளை வலுப்படுத்தும்.

-S.B.