'லோனார்' ஏரி - விண்கல்லின் விளையாட்டு

இந்தியாவின் பெருமைகளில் ஒன்று, மகாராஷ்டிராவின் புல்டானா மாவட்டத்தில் இருக்கும் லோனார் கிரேட்டர் ஏரி. இது ஒரு தேசிய புவி பாரம்பரிய நினைவுச்சின்னமாக அறிவிக்கப்பட்டு, அதன் அறிவியல் மற்றும் சுற்றுச்சூழல் முக்கியத்துவத்திற்காகப் பாதுகாக்கப்படுகிறது. இந்த ஏரி, அறிவியல் ஆராய்ச்சியாளர்களையும், இயற்கை ஆர்வலர்களையும், ஏன்? சாதாரண சுற்றுலாப் பயணிகளையும் வியக்க வைக்கிறது. பார்ப்போமா…

சுமார் 50,000 ஆண்டுகளுக்கு முன்பு, மிக வேகமாக வந்த ஒரு விண்கல் பூமியை அதிலும் குறிப்பாக நமது இந்தியாவில் மோதியது. இந்த மோதல் ஒரு பெரும் பள்ளத்தை உருவாக்கியது. சுமார் 1.8 கி.மீ. அகலம் கொண்ட இந்தப் பள்ளம், காலப்போக்கில் மழை நீரால் நிரம்பி ஒரு ஏரியாக மாறியது. இந்த ஏரியைச் சுற்றியுள்ள பாறைகள் பசால்ட்டிக் பாறைகள் (basaltic rock). இப்படி பசால்ட்டிக் பாறைகளில் உருவான விண்கல் பள்ளங்கள் உலகில் மிகவும் குறைவு. அதனால்தான், லோனார் ஏரி மிக அரிதான ஒன்றாகக் கருதப்படுகிறது.

இந்த லோனார் ஏரியின் மிகப்பெரிய சிறப்பு, அதன் நீர் இரண்டு வெவ்வேறு குணங்களைக் கொண்டது.

மேல் மட்டத்தில் உள்ள நீர் காரத்தன்மை (Alkaline) கொண்டது.

அடிமட்டத்தில் உள்ள நீர் உப்புத்தன்மை (Saline) கொண்டது.

இந்த இரு வேறுபட்ட குணங்கள் காரணமாக, ஏரியில் பல வகையான நுண்ணுயிரிகள், குறிப்பாக வெவ்வேறு பாக்டீரியாக்கள் வாழ்கின்றன. இந்த நுண்ணுயிரிகளால்தான் ஏரியின் நீர் சில சமயங்களில் பச்சை, இளஞ்சிவப்பு அல்லது சிவப்பு நிறங்களில் ஜொலிக்கிறது. இந்த நிற மாற்றங்கள் ஏரியின் அழகைக் கூட்டுகின்றன.

லோனார் ஏரியின் மண் மற்றும் சூழல், செவ்வாய் கிரகத்தின் மேற்பரப்புடன் ஒத்திருப்பதாக NASA மற்றும் ஜப்பான் விண்வெளி ஆராய்ச்சி நிறுவனங்கள் கண்டறிந்துள்ளன. இதனால், விண்வெளி ஆராய்ச்சியாளர்கள் பலமுறை இங்கு வந்து ஆய்வுகள் செய்துள்ளனர். சரி இதற்கு நம் புராணங்களில் இல்லையா என்றால் இதோ இருக்கிறது… ஸ்கந்த புராணம் போன்ற இந்து சமய நூல்களில் இந்த ஏரி குறிப்பிடப்பட்டுள்ளது. ஏரியின் கரையில் உள்ள பழமையான விஞ்சார் தேவி மற்றும் கமலஜா தேவி கோவில்கள் ஆயிரக்கணக்கான ஆண்டுகளாக இங்குள்ள மக்களின் நம்பிக்கையை பறைசாற்றுகின்றன.

இன்று, லோனார் ஏரி ஒரு முக்கிய சுற்றுலாத் தலமாக மாறியுள்ளது. பறவைகளை நேசிப்பவர்கள், உயிரியல் ஆய்வாளர்கள், இயற்கையின் அழகை ரசிக்க வருபவர்கள் என பலதரப்பட்ட மக்களும் இங்கு வருகிறார்கள். ஆனால், சுற்றுலாப் பயணிகளால் ஏற்படும் பிளாஸ்டிக் கழிவுகள் மற்றும் சுற்றுச்சூழல் மாசுபாடு ஏரியின் தூய்மையைக் கெடுக்கின்றன. இந்த அரிய இயற்கைச் சின்னத்தைப் பாதுகாக்க அரசு மட்டுமல்ல, நம் ஒவ்வொருவருக்கும் பொறுப்பு உண்டு.

லோனார் கிரேட்டர் ஏரி ஒரு சாதாரண ஏரி அல்ல. இது விண்வெளிக்கும் பூமிக்கும் இடையிலான ஒரு உறவின் அடையாளம். இது இயற்கையின் அசாத்திய சக்தியையும், காலத்தின் அற்புதங்களையும் நமக்கு உணர்த்துகிறது. இந்த அரிய அதிசயத்தைப் பாதுகாப்பது நம் அனைவரின் கடமை.